ئەفلاتون یەکێکە لەو بیریارانەی پاش خۆی نەریتێکی فەلسەفیی درێژخایەنی جێ هێشتووە. ئەم نەریتە یار و نەیاری بۆ خۆی دروست کردووە و ڕاڤەی جۆراوجۆریشی بۆ کراوە. بۆچوونە فەلسەفییەکانی نێو ئەم نەریتە کە لە سەدەی چوارەمی پێش زایینەوە سەریان هەڵداوە، تاکوو ئەمڕۆ مشت‌ومڕیان لەسەر دەکرێت، بێگومان ئەمەش پەیوەندیی بە کاریگەرێتیی ئەم بۆچوونانە بە سەر مێژووی بیرکردنەوەی فەلسەفییەوە هەیە کە نکۆڵیی لێ ناکرێت و نابێت ئاوڕی لێ نەدرێتەوە.